نصائح هامة وتحذيرات قبل شراء الشاشة

 رايح تشتري شاشة .......خد بالك !!!

- الشاشة مش كام بوصة وخلاص ........ده كان زمان..... لكن مع الشاشات الاهم ثم الأهم المواصفات وأوعى تفتكر الشاشة حسب حجم الشاشة وخلاص ...

خد بالك كل شئ فى التفاصيل..... الأهم مواصفات الشاشة!!!!!

المواصفات الضرورية اللى لازم تكون موجودة:

1- جودة الشاشات إما:

HD Redy

full hd

4k

الأفضل بالترتيب 4k يليها full hd وبلاشHD Redy

2- أن تكون الشاشة تدعم البث الرقمي الارضي DTV (معظم الشاشات الآن تدعم هذه الخدمة),هذة خاصية مهمة .

3- اسأل عما يسمى سرعه التردد والحركةRefresh Rate قيمته تكون 60 او 120 او 240 هرتز - كلما زاد الرقم زاد معدل تحديث الصورة وبالتالى تكون الصورة أفضل .وبخاصة في مباريات كرة القدم وأفلام الحركة.

4- عدد مخارج الشاشة ومداخلها

- فيه شاشات ثري دي وفوركى بس اسأل نفسك هل أنا محتاج المواصفات دي ؟!!! وهل فيه قنوات تبث بهذه الصيغ؟!! وهل هناك افلام الثري دي متوفرة أصلا؟!! وخد بالك تصنيع الشاشات الثري دي وقف تماما!!!!!ومحدش بيصنعها الوقتي !!

- اشتري شاشة من ماركات عالمية وابعد عن الأسماء الغريبة حتى ولو سعرها حلو وخليك فاكر المثل اللى بيقول "الغالى تمنه فيه " بس الفكرة مش في الثمن ....الفكرة في الضمان والدعم الفني لها علشان لو حصل للشاشة حاجة تعرف تصلحها ....رغم أن إحنا عارفين أن الحاجات دي في مصر حاجة تقرف !

وخد بالك لو سألت أى واحد بيبيع شاشات هيحاول يقنعك بنوع الشاشة اللى عندة ويقولك ممتازة وحمارة شغل وصورتها روعة !!! ادخل النت وشوف المواصفات وقارن بين الامكانيات والسعر واحتياجاتك

بس نصيحة خليك في السوني ودي أفضل شاشة بلا منازع وبعده سامسونج و LG و tcl

د- وعلشان إحنا في مصر نقول توشيبا علشان الضمان .ومتخرجش عن دول إلا لو ماركة عالمية محترمة.

- عاوز شاشة سمارت لازم يكون عندك سرعة نت كويسة وتكون بتعرف تتعامل مع تطبيقات النت.تجربة وجود شاشة سمارت شئ مميز

- الانتاج المصري من الشاشات وبخاصة LG و السامسونج فيه مشاكل فو لقيت شاشة كوري او تركي أو تايلاندي امسك فيها بايديك وسنانك

- الشاشة في المحل بتكون صورتها خرافة بس خد بالك اللي بيعرضوه في المحل دي مادة مسجلة بمواصفات ممتازة جدا جدا علشان لما تاخد الشاشة البيت متقولش دول ضحكوا عليا.

- الشاشة المحترمة بتحتاج ريسيفر محترم يتوصل في الشاشة ومتعملش زي اللي بوظ طبخة حلوة علشان بقرش ملح وكمان لما توصل الشاشة وصلها بوصلة اتش دي بلاش توصلها بوصلة الاديو فيديو علشان الصورة تبقى أحلى

الحفاظ على الشاشة :

خلاص اشتريت ...مبروك.... بس خد بالك الشاشات حساسة جدا فيجب الحفاظ عليها والاعتناء بها:

1- يفضل ان يتم تعليق الشاشة علي الحائط وان يكون هناك فاصل للتهوية بين الحامل والشاشة وياريت يكون بينها وبين الحائط مسافة لا تقل عن 10 سم أو أكثر!!! وكمان علشان لو حبيت توصل الشاشة بريسيفر او جهاز ألعاب أو هارد .

2- عدم مسح الشاشه بأى سائل غير السوائل المخصصه لذلك.عند محلات الكمبيوتر سائل لمسح شاشات الكمبيوتر

3- أسوأ شيء للشاشات تعرضها للاهتزاز كثيرا وبخاصة من جانب الأطفال فهذا يدمر الشاشة في شهور قليلة ويجعل عمرها الافتراضي اقل .

4- تثبيت فيشة الشاشه بأحكام حتى لا تفصل من الكهرباء من تلقاء نفسها والكهرباء الواصلة للشاشة يجب أن تكون بشكل منفرد بعيدا عن فكرة المشترك وده هام جدا ويفضل للحفاظ علي الكهرباء الداخلة للمنزل استخدام منظم كهرباء لان مشاكل الكهرباء تنهي الشاشات في شهور معدودة خاصة انها تدمر الماين لوجيك والبور لوجيك الخاص بالشاشات. وطبعا الكهرباء عندنا في مصر بتدخل البيت أقل من المفروض

5- لو حصل حاجة للشاشة بعد ما اشتريتها واتصلت بالتوكيل ولم يلتزموا قم بالاتصال بجهاز حماية المستهلك على رقم 19588 واشرح لهم تفاصيل المشكلة ومكانهم بالمهندسين 96 شارع أحمد عرابى, بس لازم يكون معاك الفاتورة . واعرف أن حسب القانون يمكن تغيير الشاشة إذا كان العيب في خلال 14 يوم من الشراء.